کر رہے ہیں دوا خیال کئی

کر رہے ہیں دوا خیال کئی
تیرے بیمار کے ہیں حال کئی
آہٹیں دستکیں پرانے خط
ہجر میں ہوتے ہیں وبال کئی


صرف آنکھوں کے اک اشارے سے
پوچھ لیتا ہے وہ سوال کئی
خوب جھک جھک ہوئی مچھیروں میں
ایک مچھلی تھی اور جال کئی


سیکھ لو چال قابو میں رکھنا
راستے میں پڑیں گے ڈھال کئی
اس کی چوکھٹ سے اس کے قدموں تک
پہنچنے میں لگے ہیں سال کئی


روح کے دشت سے لگا لائی
زندگی جان کو وبال کئی
دیکھ کر چل عروج کی جانب
گھات میں بیٹھے ہیں زوال کئی