کٹے گی کیسے ہماری وہاں پہ جائے بغیر

کٹے گی کیسے ہماری وہاں پہ جائے بغیر
چلے تو آئے ہیں شارقؔ اسے منائے بغیر
عجب طرح کے ملے رہ گذار عشق میں لوگ
کوئی گیا ہی نہیں راستہ بتائے بغیر


اداس ہوں کہ مرا کھیل ختم ہو ہی گیا
تماشبین کی کچھ بھی سمجھ میں آئے بغیر
اب ایک جسم ہے اور بین کرتے کچھ احباب
چلے گئے ہیں کہاں خود کو ہم بتائے بغیر


تمہارے ہجر کا احسان ہم پہ صد احسان
یہ تجربہ کسے ہوتا ہے موت آئے بغیر