katib-e-taqdir mere haq mein kuchh tahrir ho
ranj ho ya shadmani kuchh to daman-gir ho

aab-rud-e-zist ke kuchh ghunt zahrile bhi hon
main ne kab chaha tha har qatra mujhe iksir ho

ahd-e-azadi se behtar qaid-e-zindan ho to phir
tod dene ki qafas ko kyun koi tadbir ho

tez lahren aa hi jati hain mitane ke liye
jab lab-e-sahil gharaunda ret ka tamir ho

gham rahe pinhan dar o diwar dil ke darmiyan
kya zaruri hai ki karb-e-zist ki tashhir ho