kaun ab jae tere pas shikayat le kar
roz aate hain tere khwab mohabbat le kar

is qadar mujh se takalluf ki zarurat kya hai
main agar tujh ko chunga to ijazat le kar

husn be-parda hua aur tawaqqo ye hai
ishq dekhe use aankhon mein sharafat le kar

daftar-e-ishq ka sarkari mulazim hun main
laut jaunga teri did ki rishwat le kar

apna chehra tha kabhi jin ki tamanna 'yasir'
ab wo kahte hain nikal jao ye surat le kar