kaun phir hosh mein aae kise phir hosh rahe
jab teri mast nazar mai-kada-bar-dosh rahe

zulf aashufta nazar mast damakte rukhsar
yun jo aa jao to phir kis ko bhala hosh rahe

ye hai mai-khana-e-ishq is ka yahi hai dastur
hosh wala bhi yahan aae to behosh rahe

bhul kar bhi na chakha qatra-e-mai hum ne kabhi
teri mahfil mein magar surat-e-mai-nosh rahe

jaane kya baat thi kya haal tha mera 'azmat'
wo mujhe dekhne aae bhi to khamosh rahe