khar dushman jo bichhae to koi baat nahin
rah-e-pur-khar bhi aae to koi baat nahin

ho saka jitna tujhe dil mein sanbhaale rakkha
aaj daman tu bachae to koi baat nahin

tujh se ummid-e-wafa hum ne sanam rakkhi hai
tu sitam aur bhi dhae to koi baat nahin

tu ne bakhshi thin meri zist ko khushiyan phir bhi
ab agar mujh ko rulae to koi baat nahin

dard to yun bhi gham-e-dil ko maza deta hai
tu agar dard badhae to koi baat nahin

mahfil-e-yar mein mujh ko na mili koi khushi
ab agar zulm bhi dhae to koi baat nahin

jis ki har baat pe tha mujh ko bharosa 'atish'
wo mujhe chhod ke jae to koi baat nahin