KHak hun tur samajh aur jila de mujhko

khak hun tur samajh aur jila de mujh ko
ai khuda apni tajalli ki ziya de mujh ko
maula majzub minallah bana de mujh ko
ishq-e-sadiq ki yun mearaj kara de mujh ko


aisi koi bhi na ai yar dua de mujh ko
mar hi jaun koi aisi to saza de mujh ko
roz-e-mahshar to abhi dur hai mere allah
kar koi moajiza aur khud se mila de mujh ko


nahin karna hai mujhe ishq-e-majazi kisi se
maula ishq-e-azali karna sikha de mujh ko
aaj rote hue main ne to use kah diya hai
ki main darwesh sifat hun tu bhula de mujh ko


tang aane laga hun zindagi ki uljhanon se
apni qudrat se khuda rah-e-fana de mujh ko
dard ehsas khushi jaisi koi chiz na ho
tu hi tu ho ba-khuda aisi faza de mujh ko


tera ehsas jilata hai mera daman-e-yar
bhul jaun tujhe taufiq-e-khuda de mujh ko
meri manzil ka pata puchhte hain mujh se log
kuchh to kar aisa tamasha hi bana de mujh ko