خاک کے زخم کو پانی سے رفو کرتے ہیں

خاک کے زخم کو پانی سے رفو کرتے ہیں
دیکھ ہم کتنی روانی سے رفو کرتے ہیں
کبھی کرتے ہیں رفو خون کی اک دھار سے ہم
اور کبھی اشک فشانی سے رفو کرتے ہیں


کثرت خواب سے پھٹ جاتی ہیں اکثر آنکھیں
ہم ان آنکھوں کو کہانی سے رفو کرتے ہیں
دیر تک ایک جگہ رہنے سے آ جاتے ہیں زخم
تو انہیں نقل مکانی سے رفو کرتے ہیں


ہم وہ بد بخت مہاجر ہیں کہ ہجرت کے شگاف
مستقل ہجرت ثانی سے رفو کرتے ہیں
سنگ احساس ادھر آ کہ رلا کر تجھ کو
ترا پتھر ترے پانی سے رفو کرتے ہیں