خاک لے جائیں یہاں سے کہ ہوا لے جائیں

خاک لے جائیں یہاں سے کہ ہوا لے جائیں
کیا ترے شہر میں ہم چھوڑ دیں کیا لے جائیں
بحر غم ہم سے بھی پیراک نہ دیکھے ہوں گے
ڈوبتے جائیں مگر خود کو سنبھالے جائیں


خشک پتوں پہ نہ تحریر محبت لکھو
کل کہیں ان کو ہوائیں نہ اڑا لے جائیں
جان مانگے ہے بہت ان سے تعلق رکھنا
جو بچھڑنے کے لیے راہ نکالے جائیں


ہارنے والوں نے اس رخ سے بھی سوچا ہو گا
سر کٹانا ہے تو ہتھیار نہ ڈالے جائیں