khak ugati hain suraten kya kya
aainon mein hain hairaten kya kya

umr ke be-sabaat safhon par
likh raha hun ibaraten kya kya

khulte jate hain bab-e-harf-o-sada
ho rahi hain ziyaraten kya kya

mud ke dekhun to naqsh-e-pa ki tarah
ham-safar hain riwayaten kya kya

lafz aawaz aur sae mein
dhundhta hun shabahaten kya kya

khwab se paikar-e-maani tak
runuma hain alamaten kya kya

rang lai hai hasrat-e-tamir
gir rahi hain imaraten kya kya

aadmi marsiyon ki surat mein
likh raha hai bashaaraten kya kya