خوف منجدھار سے جو کھاتا ہے

خوف منجدھار سے جو کھاتا ہے
وہ کنارے پہ ڈوب جاتا ہے
تیر اس زاویہ سے آتا ہے
شک مرا دوستوں پہ جاتا ہے


میں نے بیساکھیاں جسے دی تھیں
وہ مجھے دوڑنا سکھاتا ہے
سانپ کی کینچلی کو لہرا کر
تو سپیروں کو کیا ڈراتا ہے


درد بیواؤں کا وہ کیا جانے
جو ہری چوڑیاں بناتا ہے
پاؤں اس کے بھی نرم ہوتے ہیں
جو تری پالکی اٹھاتا ہے


چھین لیتی ہے بال و پر قدرت
مور جب رقص بھول جاتا ہے
اک فرشتہ اڑان سے پہلے
تیرے کوچے سے کچھ اٹھاتا ہے