khauf us ka usi se darta hun
main kahan aadmi se darta hun

tirgi ab mera muqaddar hai
is liye raushni se darta hun

maut bar-haq hai aaegi lekin
teri chaaragari se darta hun

jis ka ehsan bojh ban jae
bas usi aadmi se darta hun

aakhirat ka nahin khayal zara
dil ki is gum-rahi se darta hun

jis se aae amal mein kotahi
main usi aagahi se darta hun

yun mile mujh ko dosti mein fareb
aaj tak dosti se darta hun

main bhi 'maqsud' daur-e-hazir mein
maut ya zindagi se darta hun