KHayal-e-zehn-shikan se zaban bhar aa jae

khayal-e-zehn-shikan se zaban bhar aa jae
ye ho to hath mere koi sher-e-tar aa jae
hamare mitne se duniya hui hai aisi nihan
ki jaise bij se bahar koi shajar aa jae


banai main ne jo be-surati ke patthar se
main kya karun isi murat pe dil agar aa jae
chaman tamam to aahat pe us ki jhum utha
yahan ye khabt wo sail-e-hawa nazar aa jae


bhanwar musir hai ki aaghosh-e-tang mein dariya
tamam wusat-e-nakhwat samet kar aa jae
kashish bhi us ki ghazab roab-e-husn bhi aisa
ki samna hi na kar paun wo agar aa jae


rahoge phir bhi 'muhib' sath-e-bahr hi se do-chaar
agar tumhaare liye tah bhi sath par aa jae