khayal rakhna mera zakhm bhar na jae kahin
hawadisat ka dariya utar na jae kahin

usi se zinda hai ehsas aashiyane ka
ye rakh tez hawa hai bikhar na jae kahin

bhatakti phirti hai aawara dar-ba-dar kab se
shab-e-firaq hamare hi ghar na jae kahin

jo chal raha hai bagulon ki rahnumai mein
wo karwan-e-mohabbat thahar na jae kahin

wo zulm kije ki hasrat na rah sake baqi
sahar se pahle hi 'ghamgin' mar na jae kahin