khiDkiyon se bhi agar dhup na aai hoti

khidkiyon se bhi agar dhup na aai hoti
hum ne din hote hue sham' jalai hoti
apni aankhon ko agar hum bhi bacha le jate
sans lete hue manzar se burai hoti


log mar’ub bahut hain teri mehrabon se
bel hi koi sutunon pe chadhai hoti
meri aankhon ke darichon mein sabhi rang us ke
dil ki diwar bhi kash us ne sajai hoti


hum ko manzur na thi qaid-e-wafadari-e-shah
warna pairon mein bhi zanjir-e-tilai hoti
sare tehwar guzar jate hain sune sune
ye 'imarat bhi kabhi tum ne sajai hoti