KHizan-rasida hain ab tak meri bahaar ke din

khizan-rasida hain ab tak meri bahaar ke din
tere baghair mayassar nahin qarar ke din
jidhar bhi dekhiye shoale dikhai dete hain
chaman mein ras na aae hamein bahaar ke din


wo baada-khez nigahon ki junbishen tauba
mile the mujh ko bhi ye masti-o-khumar ke din
khizan bhi aaegi ek din ye baat lazim hai
guzar lete mere sath tum bahaar ke din


ye aur baat hai qismat palat gai meri
mujhe hain yaad abhi tak tumhaare pyar ke din
hamein to yaad hi un ki rulati rahti hai
tumhaare sath guzare the jo qarar ke din


tadapta chhod ke 'iqbaal' ko na jao tum
katenge kaise bhala is se intizar ke din