KHud apne waste kya kya suKHan banate hain

khud apne waste kya kya sukhan banate hain
kisi ki zulf ko jab pur-shikan banate hain
ghazal-e-sham-o-sahar yunhi ram kiye jaen
hum apne sine ko dasht-e-khutan banate hain


usi ki khak ke hum bhi bane hue hain miyan
ye chaak hai chalo us ka badan banate hain
ye log bhage hue hain tere visal se kya
jo tere hijr ko apna watan banate hain


hamin pe padti hain un aainon ki bauchhaaren
to hum bhi un ke liye bankpan banate hain
tamam 'umr ki aashuftagi-e-jaan ke 'ewaz
kisi ke lams ko apna kafan banate hain