khud ko ahl-e-wafa samajhte hain
auron ko bewafa samajhte hain

par kashti laga ke dikhlaen
khud ko gar nakhuda samajhte hain

khamiyan dusron ki ginwaen
khud ko jo parsa samajhte hain

kah bhi dalen zaban se apni
jo bura ya bhala samajhte hain

ek nai zindagi hai baad-az-marg
log use intiha samajhte hain

hirs-o-tama ki daud jari hai
sab isi mein baqa samajhte hain

kis tarah jaan lun 'sabiha' ko
apne dil mein wo kya samajhte hain