خود کو کس طرح تم سنبھالو گے

خود کو کس طرح تم سنبھالو گے
جب تلک ان کے خواب پالو گے
جیسا تم نے کیا وہ کر دوں تو
سر پہ دنیا کو تم اٹھا لو گے


جان دل روح زندگی بولو
پیار سے دیکھنے کا کیا لو گے
تم نے بھی ڈوبنے دیا مجھ کو
مجھ کو لگتا تھا تم بچا لو گے


اپنے رستے کو جاننے کے بعد
ایک دن تم بھی راستہ لو گے
تم کو کوئی بھی کچھ نہ بولے گا
تم جسے چاہو آزما لو گے


تم سنبھالو تو ہوگا کچھ اپنا
کچھ بھی ہوگا تو تم سنبھالو گے
ہاتھ ہوں گے تمہارے بھی گندے
ہم پہ کیچڑ اگر اچھالو گے


بھیج کر ہم کو کورا کاغذ تم
اور مشکل میں کتنی ڈالو گے