KHud se KHudi ke aib chhupana fuzul hai

khud se khudi ke aib chhupana fuzul hai
yun aaine ko aankh dikhana fuzul hai
ehsas ko mazaq banana fuzul hai
tum ko to dil ki baat batana fuzul hai


pani se dil ki aag bujhana fuzul hai
ai shakhs aansuon mein nahana fuzul hai
mumkin hai nind nind na ho kar bahana ho
wo so nahin raha to jagana fuzul hai


us ne jo than hi li agar khud-kushi ki to
phir to use usi se bachana fuzul hai
hum lakh tajrabon se yahi kah rahe hain ab
ik-tarfa rabt ho to nibhana fuzul hai


jalwa-numa hain aap agar khwab hi mein to
phir to hamara hosh mein aana fuzul hai
hai ye taqaza rasm-e-adab ka wagarna to
main jaanta hun hath milana fuzul hai