KHuda muaf kare zindagi banate hain

khuda mu'af kare zindagi banate hain
mere gunah mujhe aadmi banate hain
hawas hai sare jahanon pe hukmrani ki
wo sirf chand nahin raat bhi banate hain


mere liye to muqaddas hain wo sahife bhi
jo raushni ke liye raushni banate hain
na is hujum mein rakkho mujhe khuda ke liye
jo sher kahte nahin sha'iri banate hain


tabah kar to dun zahir-parast duniya ko
ye aaine bhi mere log hi banate hain
main aasman banata hun meri baat karo
yahan to chand sitare sabhi banate hain


main shukriya ada karta hun sab raqibon ka
yahi andhere mujhe raushni banate hain