khuli aankhon mein sapna jhankta hai
wo soya hai ki kuchh kuchh jagta hai

teri chahat ke bhige jangalon mein
mera tan mor ban kar nachta hai

mujhe har kaifiyat mein kyun na samjhe
wo mere sab hawale jaanta hai

main us ki dastaras mein hun magar wo
mujhe meri raza se mangta hai

kisi ke dhyan mein duba hua dil
bahane se mujhe bhi talta hai

sadak ko chhod kar chalna padega
ki mere ghar ka kachcha rasta hai