KHush hun ki zindagi ne koi kaam kar diya

khush hun ki zindagi ne koi kaam kar diya
mujh ko supurd-e-gardish-e-ayyam kar diya
saqi siyah-khana-e-hasti mein dekhna
raushan charagh kis ne sar-e-sham kar diya


pahle mere khulus ko dete rahe fareb
aakhir mere khulus ko badnam kar diya
kitni duaen dun teri zulf-e-daraaz ko
kitna wasia silsila-e-dam kar diya


wo chashm-e-mast kitni khabar-dar thi 'adam'
khud hosh mein rahi hamein badnam kar diya