khushk aankhon se nikal kar aasman par phail ja ai ghubar-e-arzu ta-hadd-e-manzar phail ja motiyon ki aabruen lutne wale bahut sip ke qaidi samundar-dar-samundar phail ja yun palak par jagmagana do ghadi ka aish hai raushni ban kar mere andar hi andar phail ja aa mere sine se lag ja tu agar sailab hai aur khushbu hai to ja basti mein ghar ghar phail ja naqsh-e-pa pamal rahon par laga dega tujhe raste mein gard ki manind ud kar phail ja