khususi lutf-farmai na chhodi
un aankhon ne masihai na chhodi

rahin pabandiyan jab tak zaban par
khamoshi ne bhi goyai na chhodi

hue pairahan-e-gul chaak-dar-chaak
saba ne naz-farmai na chhodi

hamein bhi aarzu-e-nek-nami
hawa-e-ku-e-ruswai na chhodi

usi se chashm-o-dil ki zindagi thi
mataa-e-na-shakebai na chhodi

hazaron ranj-o-gham hain phir bhi dil ne
tere gham ki pazirai na chhodi

khirad ne lakh samjhaya daraya
junun ne hashr-arai na chhodi

hawadis se guzarne par bhi 'mansha'
ghazal ne shan-e-ranai na chhodi