khwab aur haqiqat ki taswir nazar aai
tadbir inan-gir-e-taqdir nazar aai

aafat-e-musalsal mein ek rabt nazar aaya
haalat-e-digar-gun mein zanjir nazar aai

jo apne naqais the wo husn nazar aae
auron mein jo khubi thi taqsir nazar aai

raazi-ba-raza ho kar dekha to musibat bhi
gul-ha-e-shagufta ki zanjir nazar aai

yaadon ke jharoke se dekha to mujhe 'talib'
ayyam-e-bahaaran ki taswir nazar aai