khwab se chaunk chaunk utha ki nahin
naqsh-bar-ab tha mita ki nahin

mom mom aaftab pighla tha
aur samundar bhi barf tha ki nahin

sabz mausam pawan pawan mahka
koi pauda hara hua ki nahin

chhat pe suraj kiran kiran utra
raat ghar mein diya jala ki nahin

mauj-dar-mauj ek musalsal jang
ret ka ghar tera gira ki nahin

main safar-dar-safar khala mein raha
daera daera phira ki nahin