kisi bhi shahr mein jao kahin qayam karo
koi faza koi manzar kisi ke nam karo

dua salam zaruri hai shahr walon se
magar akele mein apna bhi ehtiram karo

hamesha amn nahin hota fakhtaon mein
kabhi-kabhaar uqabon se bhi kalam karo

har ek basti badalti hai rang-rup kai
jahan bhi subh guzaro udhar hi sham karo

khuda ke hukm se shaitan bhi hai aadam bhi
wo apna kaam karega tum apna kaam karo