kisi ke gham mein shirkat chahiye thi

kisi ke gham mein shirkat chahiye thi
kisi ke gham se fursat chahiye thi
meri aankhon ko rahat chahiye thi
kisi surat wo surat chahiye thi


kisi ki tum ko sohbat chahiye thi
hamein lekin mohabbat chahiye thi
tu aise waqt par bichhda hai mujh se
mujhe jab teri qurbat chahiye thi


tujhe pane ko jo bhi chahiye tha
wo sab tha sirf qismat chahiye thi
tere hone se diqqat hai bahut hai
mujhe lekin ye diqqat chahiye thi


faqat diwar ko ghar kaise kahta
mere sar par mujhe chhat chahiye thi
ijazat thi nahin rone ki hum ko
so rone ki ijazat chahiye thi