کسی لے میں کسی بھی تال میں ہم

کسی لے میں کسی بھی تال میں ہم
رہے سر میں مگر دھمال میں ہم
بھلے باہوش تھے یا وجد میں تھے
تجھے بھولے نہیں ہر حال میں ہم


تھے گرچہ وجد کے عالم میں دنیا
نہیں الجھے ترے جنجال میں ہم
کبھی پہنچے ترے باعث سر عرش
کبھی پائے گئے پاتال میں ہم


سمجھ پایا نہیں کچھ بھی زمانہ
رہے کچھ ایسے حال و قال میں ہم
ہمیں سمجھا گیا آدھا ادھورا
بھلے تھے حالت اکمال میں ہم


نہیں تسنیمؔ مستقبل ہمارا
ملیں گے ماضیٔ پامال میں ہم