کسی مقام سے گزرے نہیں پھسلتا ہے

کسی مقام سے گزرے نہیں پھسلتا ہے
جو حق پرستوں کے نقش قدم پہ چلتا ہے
سنا ہے کرنے لگا ہے وہ روشنی تقسیم
مرے چراغ سے جس کا چراغ جلتا ہے


فضائے زیست پہ چھائی ہوئی ہے تاریکی
بہت دنوں سے یہ منظر نہیں بدلتا ہے
بساط اتنی کہاں ہے جو چھیڑیں سورج کو
ان آندھیوں کا دیوں پر ہی زور چلتا ہے


تمہارے ظلم پہ چپ ہوں یہ ظرف ہے میرا
ابلنے کو تو مرا بھی لہو ابلتا ہے
ہمیں نہ کیجئے مجبور ہجرتوں کے لئے
درخت اپنا ٹھکانہ نہیں بدلتا ہے


خدا ہی حامی و ناصر ہے اس کا اے عالمؔ
جو کھا کے بارہا ٹھوکر نہیں سنبھلتا ہے