کسی نے پہلے شکایت کی انتہا کر دی

کسی نے پہلے شکایت کی انتہا کر دی
پھر اس کے بعد محبت کی انتہا کر دی
تمہارے بارے میں جب سوچنے میں بیٹھا تو
دماغ و دل نے عداوت کی انتہا کر دی


میں اپنے آپ کو تقسیم کر کے لوٹا ہوں
لو آج میں نے سخاوت کی انتہا کر دی
وہ سج سنور کے کچھ اتنا حسین لگنے لگا
کہ آئنوں نے بھی حیرت کی انتہا کر دی


ہوا چلی تو لویں سب نے تیز تر کر لیں
دیوں نے اب کے جسارت کی انتہا کر دی
سخاوتوں کے غلط فائدے اٹھائے گئے
ضرورتوں نے ضرورت کی انتہا کر دی


میں اس کے وعدے پہ پھر اعتبار کر بیٹھا
کمالؔ میں نے حماقت کی انتہا کر دی