کسی سے اے دل ناداں جو پیار کرنا ہے

کسی سے اے دل ناداں جو پیار کرنا ہے
تو ضبط کی تمہیں ہر حد کو پار کرنا ہے
کسی امیر کی الفت سے کیا ملے گا مجھے
غریب ہوں تو غریبوں سے پیار کرنا ہے


ہر ایک دل میں جلا دو محبتوں کے چراغ
وطن کو اپنے اگر پر بہار کرنا ہے
امیر شہر بناتا ہے روز منصوبے
کسے ذلیل کسے پر وقار کرنا ہے


تمام شہر کے دل میں بسا دے پیار مرا
مرے خدا جو مجھے تاجدار کرنا ہے
لگا رہے ہو جو پابندیاں محبت پر
یہ جرم ہے تو ہمیں بار بار کرنا ہے


زباں سے اس کی ادا ہو جو بات اے رضواںؔ
درست ہو کہ غلط اعتبار کرنا ہے