kitne naghmon se murassa zindagi ka saz hai
tar ek tute agar to maut ka aaghaz hai

jism-e-khaki mein parinda ruh ka paband hai
muntashir jab hon anasir ruh ko parwaz hai

chand din par mushtamil hai zindagi insan ki
phir bhi ai nadan tujh ko is pe itna naz hai

gar gunah-aluda ho jae jahan-e-dil tera
zindagi ka saz goya be-sada yak saz hai

garche barson se rahi khamosh 'tashna' ki zaban
dil-shikasta ki magar ye dil-nashin aawaz hai