koi arman hi nahin paya
dil pareshan hi nahin paya

khatm hone lage mere kartab
un ko hairan hi nahin paya

sab ki aankhen kharid lin us ne
koi pahchan hi nahin paya

zindagi tujh ko kitni jaldi thi
main tujhe jaan hi nahin paya

kal main baitha tha kaise logon mein
khud ko pahchan hi nahin paya

chadaron mein lipat gaya wo shahr
chadaren tan hi nahin paya

mujh ko mazlum kya samajhte wo
mujh ko insan hi nahin paya