کوئی بھی شکل ہو یا نام کوئی یاد نہ تھا

کوئی بھی شکل ہو یا نام کوئی یاد نہ تھا
عجیب شام تھی اس شام کوئی یاد نہ تھا
جنہیں پلٹنے کی فرصت نہیں رہی وہ لوگ
گھروں سے نکلے تھے تو کام کوئی یاد نہ تھا


ستارۂ سفر اپنے بچھڑنے والوں کو
پکارتا رہا گو نام کوئی یاد نہ تھا
تری گلی ہی نہیں تیرے شہر تک کو بھی
ہم ایسا صاحب آرام کوئی یاد نہ تھا


متاع عمر ہوئی خرچ اور بتاتے ہوئے
نہ وہ دریچہ نہ وہ بام کوئی یاد نہ تھا