کوئی دکاں نہ خریدار دیکھ سکتا ہوں

کوئی دکاں نہ خریدار دیکھ سکتا ہوں
میں صرف دور سے بازار دیکھ سکتا ہوں
کہاں سے آتے ہیں کردار دیکھ سکتا ہوں
میں اب کہانی کے اس پار دیکھ سکتا ہوں


ابھی تو دور ہے آنکھوں سے پیاس کا پردہ
ابھی میں پانی میں دستار دیکھ سکتا ہوں
کسی نگاہ میں اقرار ہے زمیں والا
میں اب ستاروں کے اس پار دیکھ سکتا ہوں


ترے نقاب سے خیر اتنی تو سہولت ہے
میں تیری سمت لگاتار دیکھ سکتا ہوں
لگا کے رکھتا ہوں بیساکھیوں میں آئینے
میں اپنے خوابوں کی رفتار دیکھ سکتا ہوں


حکیم خطرے سے باہر بتا رہے ہیں مجھے
تو کیا میں آج کا اخبار دیکھ سکتا ہوں
پڑا ہوں آپ کی چوکھٹ پہ اس لیے کہ یہیں
میں اپنی طاقت دیدار دیکھ سکتا ہوں