koi khushi na koi gham hai kya kiya jae
bada ajib sa aalam hai kya kiya jae

zara sukun ho mayassar to koi baat bane
yahan to gardish-e-paiham hai kya kiya jae

kahin se chikh bhi utthi to rah gai dab kar
ki ghunghruon ki chhama-chham hai kya kiya jae

kahan se laiye masumiyat farishton si
gunah fitrat-e-adam hai kya kiya jae

'asir' khwab dikhaya gaya tha jannat ka
gali gali mein jahannam hai kya kiya jae