کوئی موضوع ہو تیرا حوالہ اچھا لگتا ہے

کوئی موضوع ہو تیرا حوالہ اچھا لگتا ہے
پھر اس کے بعد ہر چپ رہنے والا اچھا لگتا ہے
اک ایسی بے نتیجہ جنگ لڑ کر آ رہا ہوں میں
کہ اب شمشیر سے بڑھ کر پیالہ اچھا لگتا ہے


بہت آرائش خانہ کے منصوبے بناتا ہوں
مگر کمرے کی چھت پر ایک جالا اچھا لگتا ہے
مجھے اچھا نہیں لگتا زباں کو بند کر لینا
مگر بچوں کے ہاتھوں میں نوالہ اچھا لگتا ہے


کبھی دل شاد رہتا ہے کسی کے ملتے رہنے سے
کبھی کوئی بچھڑ کر جانے والا اچھا لگتا ہے
عناصر سے الگ کر کے میں تجھ کو دیکھنا چاہوں
ترے ہم راہ سب کچھ لا محالہ اچھا لگتا ہے


اسی اک بات پر ہے اتفاق و اختلاف اس سے
اسے آئینہ اور مجھ کو پیالہ اچھا لگتا ہے
وہ کوئی اور ہے ہم میں سے ہرگز ہو نہیں سکتا
جسے اس گھر سے باہر کا اجالا اچھا لگتا ہے