کوئی نگاہ پریشاں مری تلاش میں ہے

کوئی نگاہ پریشاں مری تلاش میں ہے
غم حیات کا ساماں مری تلاش میں ہے
میں اپنے آپ پہ شیدا ہوا ہوں جس دن سے
تبھی سے حسن نگاراں مری تلاش میں ہے


مجھے تو واسطہ کوئی نہیں ہے دنیا سے
نہ جانے پھر بھی کیوں انساں مری تلاش میں ہے
جو اپنے آپ کو اب تک تلاش کر نہ سکا
سنا ہے میں نے وہ ناداں مری تلاش میں ہے


کسی حسیں نے سنائی ہے جب سے میری غزل
تبھی سے محفل یاراں مری تلاش میں ہے
مریض عشق ہوں اور حسن ہے دوا میری
مرے ہی درد کا درماں مری تلاش میں ہے