کچھ ہمیں چھوٹ بھی مل جائے خرافات کی اب

کچھ ہمیں چھوٹ بھی مل جائے خرافات کی اب
ہم جو مامور ہیں تائید پہ ہر بات کی اب
اپنی مصروفیت آپ اور بڑھاتے جائیں
ہم تو عرضی لئے جاتے ہیں ملاقات کی اب


ہجر کا چاند ضرورت سے زیادہ روشن
رونقیں ایسے بڑھاؤ گے مری رات کی اب
ناچ کر تھک چکے سب تیرے خریدے ہوئے مور
جھوٹ کی فصل کو امید ہے برسات کی اب


عدل کیا ملنا ہے کشکول بچا رہ جائے
صرف زنجیر ہلاتے رہو خیرات کی اب