kuchh khwab kuchh khayal mein mastur ho gae
tum kya qarib nikle ki sab dur ho gae

aankhon ke dar the band to jina muhaal tha
aankhen khulin to aur bhi mazur ho gae

aise chhape ki surma-e-chashm-e-jahan hue
aise khule ki barq-e-sar-e-tur ho gae

jadugari ke raaz se na-ashna na the
hum to tere khayal se majbur ho gae

mitti pe aa gai thi zara der ko bahaar
bas log itni baat pe maghrur ho gae

patthar to puje jate hain is rah mein 'jamil'
tum to zara si thes lagi chur ho gae