کچھ ساغر چھلکانے تک محدود رہا

کچھ ساغر چھلکانے تک محدود رہا
گھر کا غم میخانے تک محدود رہا
بیچ بیچ میں میرا ہوش میں آنا بھی
منظر کو دھندلانے تک محدود رہا


آج کا قصہ شہزادے کی باتوں میں
پریوں کے آ جانے تک محدود رہا
شہر کی سرحد چند قدم پر تھی لیکن
دیوانہ ویرانے تک محدود رہا


صاف تھی اس کی ہر آہٹ ہر سانس مگر
میں خود کو چونکانے تک محدود رہا
رک رک کر آتی سانسوں کا دھوکہ بھی
صرف اسے جھٹلانے تک محدود رہا