kya KHabar thi ishq mein ye bhi sitam ho jaega

kya khabar thi ishq mein ye bhi sitam ho jaega
aankh mein aansu na honge dard kam ho jaega
apne aibon dusron ki khubiyon par rakh nazar
tu bhi duniya ki nazar mein mohtaram ho jaega


mere aansu jaise un ki aankh se bahne lage
kya kabhi ye moajiza ai chashm-e-nam ho jaega
kis ko tha malum hansta khelta bachpan mera
muflisi ki zad mein aa ke waqf-e-gham ho jaega


pasta-qad logon mein 'farhat' sar-bulandi jurm hai
dekhna tera bhi ek din sar qalam ho jaega