کیوں قفس میں ادھر ادھر دیکھیں

کیوں قفس میں ادھر ادھر دیکھیں
اب کوئی اور رہ گزر دیکھیں
گھر گئے ہیں نشانہ بازوں میں
تیر دیکھیں کہ اپنا سر دیکھیں


اس طرح دیکھ دور جاتے ہوئے
ہم تری راہ عمر بھر دیکھیں
بند کمرے میں صرف ہم ہی ہیں
کس بھروسے ادھر ادھر دیکھیں


ریت پر کیوں تڑپتی ہے مچھلی
آؤ دریا میں ڈوب کر دیکھیں
اب کسی رات شہر میں اس کے
کیسے پھرتے ہیں دربدر دیکھیں


اپنے ملبے کو منہ دکھانا ہے
غور سے پہلے اس کا گھر دیکھیں