kyun ujaD jati hai dil ki mahfil

kyun ujad jati hai dil ki mahfil
ye diya kaun bujha deta hai
wo nahin dekhte sahil ki taraf
jin ko tufan sada deta hai


shor din ko nahin sone deta
shab ko sannata jaga deta hai
tum to kahte the ki rut ka jadu
dasht mein phul khila deta hai


us ki marzi hai wo har rahat mein
ranj thoda sa mila deta hai
dukh to deta hai tera gham lekin
dil ko iksir bana deta hai


tujh se pahle dil-e-betab mujhe
teri aamad ka pata deta hai
jaan-e-man ek hasin chehra bhi
sari mahfil ko saja deta hai


ab tasalli bhi aziyyat hai mujhe
ab dilasa bhi rula deta hai