la ek khum-e-sharab ki mausam kharab hai
kar koi inqalab ki mausam kharab hai

zulfon ko be-khudi ki rida mein lapet de
saqi pae-shabab ki mausam kharab hai

jam-o-subu ke hosh thikane nahin rahe
mutrib utha rubab ki mausam kharab hai

ghunchon ko e'tibar-e-tulu-e-chaman nahin
rukh se ulat naqab ki mausam kharab hai

ai jaan! koi tabassum-e-rangin ki wardat
phika hai mahtab ki mausam kharab hai