lagi hai bhiD baDa mai-kade ka nam bhi hai

lagi hai bhid bada mai-kade ka nam bhi hai
kuchh is mein khub-e-rindan-e-tishna-kaam bhi hai
junun-e-shauq ne dil ko kiya tabah magar
kuchh is mein tere taghaful ka ehtimam bhi hai


kitab-e-zist hai yaksar hikayat-e-gham-e-dil
hikayat-e-gham-e-dil harf-e-na-tamam bhi hai
sukun-e-ahl-e-kharabaat-e-ishq kya kahiye
ruki ruki si yahan umr-e-tez-gam bhi hai


butan-e-shahr hum ahl-e-wafa se hain be-zar
butan-e-shahr ko ahl-e-wafa se kaam bhi hai
wo shakhs apni jagah hai muraqqa-e-tahzib
ye aur baat hai ki qatil usi ka nam bhi hai


charagh-e-subh ki afsurdagi nahin tanha
kahin qarib yahin aaftab-e-sham bhi hai
dar-e-sanam pa ruke hain magar ba-zer-e-qadam
hazar silsila-e-gardish-e-mudam bhi hai


jo khalwaton mein sukut-ashna raha sadiyon
wahi 'rawish' se sar-e-bazm ham-kalam bhi hai