lakhon gham chhupae hain ek khushi ke parde mein
dard hi ke sae hain har hansi ke parde mein

kya yaqin karen yaro apne hon ki begane
dushmani hi pate hain dosti ke parde mein

ye bhi to haqiqat hai talkh hi sahi lekin
maut hi ke sae hain zindagi ke parde mein

hasraton ki basti mein hai janaza arman ka
kulfaten hi pate hain dil lagi ke parde mein

wo jafa ke khugar hain hum wafa ke parwarda
ulfaten bhi pate hain barhami ke parde mein

apni kam-nasibi ka kya karen gila 'azim'
tirgi hi pate hain raushni ke parde mein