log apni taswiren waqt se chhupate hain
aks to haqiqat ke aaine dikhate hain

khushbuon mein phulon ki ahl-e-dil nahate hain
ban-sanwar ke mahfil mein aap jab bhi aate hain

zindagi ki rahon mein phul muskuraate hain
log sinf-e-nazuk se qurbaten badhate hain

kaise bhul jaun main dhundli dhundli yaadon ko
ye khayal to meri himmaten badhate hain

kya hasin rishta tha chandni ka aangan se
aaj bhi nigahon mein khwab jagmagate hain

sham se nikalte hain raat ka safar le kar
intizar ke suraj subh dub jate hain

kab mizaj badlega zindagi ke mausam ka
phul se badan wale hum se khar khate hain

raat bhig jati hai jugnuon ki barish se
jhutpute mein wo aksar git gungunate hain

shakl kab badal jae dar hai is liye 'sarwat'
ghar pe log namon ki takhtiyan lagate hain